٣٧ پەرلەمانتار داوادەکەن پەرلەمان لەبارەی تەواونەکردنی رێگەی کەلار - سلێمانی کۆببێتەوە
کوردسات نیوز
٣٧ ئەندامی پەرلەمانی کوردستان، داوای کۆبوونەوەیەکی تایبەتی پەرلەمان دەکەن لەبارەی "تەواونەکردنی رێگەی کەلار-سلێمانی" و رێگە تەواونەکراوەکانی دیکەی ھەرێم، داواشدەکەن وەزیرانی ئاوەدانکردنەوە و دارایی و پلاندانان لە کۆبوونەوەکەدا بەشداربن.
ئەو پەرلەمانتارانە یاداشتێکیان ئاڕاستەی دەستەی سەرۆکایەتی پەرلەمان کرد و داوایان کرد، کێشەی "تەواونەکردنی رێگەی کەلار- سلێمانی و سەرجەم رێگە تەواونەکراوەکانی ھەرێمی کوردستان" کە بوونەتە ھۆی گەیاندنی زیانی گیانی و ماددی بە ھاووڵاتیان، لەبەرنامەی دانیشتنەکانی داھاتووی پەرلەمانی کوردستان دابنرێت.
ئەو پەرلەمانتارانە داواشیانکردووە، وەزیرانی ئاوەدانکردنەوە و نیشتەجێکردن و دارایی و ئابووری و پلاندانان و لایەنی پەیوەندیدار لە ئەنجومەنی وەزیران لەو کۆبوونەوەیەدا بەشداربن و بەرنامە و پلانیان بۆ تەواوکردنی رێگە و شەقامە تەواونەکراوەکان روون بکەنەوە.
ھاوکات سەرکۆ ئازاد ئەندامی فراکسیۆنی یەکێتی لە پەرلەمانی کوردستان رایگەیاند، پێویستە رێگەی کەلار-سلێمانی ئیشی جدی بۆ بکرێت و کێشە و گرفتەکانی چارەسەر بکرێن.
|