لە ناوچەی لۆھانسکی ئۆکراین راپرسی دەکرێت بۆ ناساندنی وەک بەشێک لە روسیا
کوردسات نیوز
لە ناوچەی لۆھانسکی ئۆکرین راپرسی بۆ ناساندنی ئەو ھەرێمە وەک بەشێک لە خاکی روسیا دەکرێت، ئیدارەی ناوچەی خیرسوونیش رەزامەندی دەردەبڕێت، بۆ ئەوەی بە راپرسی ناوچەکەیان بخرێتە سەر روسیا.
ئیدارەی ناوچەی لۆھانسکی ئۆکراین، کە لەژێر کۆنترۆڵی سوپای روسیادایە رایگەیاند، لە رۆژانی ٢٣ بۆ ٢٧ی ئەم مانگە، راپرسی دەکەن بۆ ئەوەی ناوچەکەیان وەک بەشێک لە خاکی روسیا بناسێندرێت.
راشیگەیاند، یاسایەکیان لەبارەی ئەنجامدانی ئەو راپرسییەوە دەرکردووە، ھاوکات ئیدارەی ناوچەی خیرسوون رایگەیاند، رەزامەندیان دەربڕیووە لەسەر ئەنجامدانی راپرسی لە ناوچەکەیان بۆ ئەوەی بخرێتە سەر روسیا.
روسیا لەچوارچێوەی ئەو ئۆپراسیۆنە سەربازییەی لە ٢٤ی مانگی شووباتی ئەمساڵەوە دەستیپێکردووە، ناوچەکانی خیرسوون و لۆھانسک و دۆنێتسکی لە باشووری ئۆکراین کۆنترۆڵکردووە و ئامادەکاری دەکات، بۆ ئەوەی راپرسی لە ناوچە کۆنترۆڵکراوەکانی ئۆکراین بکات.
|