کازمی: قەیرانی سیاسی کاریگەریی لەسەر کارەکانی حکومەت ھەبووە

16/08/2022
موستەفا کازمی، سەرۆک وەزیرانی عێراق.
فۆتۆ: 
کوردسات نیوز

مستەفا کازمی سەرۆک وەزیرانی عێراق ڕایگەیاند، قەیرانی سیاسی کاریگەریی بەسەر کارەکانی حکومەتەوە جێھێشتووە و حکومەتەکەی ماوەی دوو ساڵە بە بێ بودجە کارەکانی ڕایی دەکات.

مستەفا کازمی لە وتەیەکدا لە کۆبوونەوەی ئەنجومەنی وەزیرانی عێراقدا ڕایگەیاند، پەیامی بۆ سەرکردەکانی وڵات ئەوەیە دەبێت لە ئاست مەترسیەکانی سەر عێراقدا بن و کار لەسەر چارەسەرکردنی کێشەکان بکەن.

ئاماژەی بەوەشکردووە، ھەر لە سەرەتاوە بڕیاریانداوە حکومەتەکەی دەستی نەچێتە خوێنی عێراقییەکان نە ئێستا نە لە داھاتوودا، پێویستە کێشەکان لەڕێگەی گفتوگۆوە چارەسەر بکرێت، بانگھێشتێکیش بۆ دەستپێکردنی گفتوگۆیەکی نیشتیمانی لە نێوان سەرکردەکانی وڵات ڕادەگەیەنێت.

کازمی باسی لەوەشکرد، حکومەت لە دۆخێکی نائاساییدا ھاتە ئاراوە و سەرکەوتوو بووە لە تێپەڕاندنی سەرجەم ڕێگرییەکان، بەڵام دوای ٢٨ مانگ  لە پێکھێنانی ئەم کابینەیە، جگە لە شەش مانگ  ھیچ بودجەیەکی دیکەی لەبەردەستدا نەبووە.