١٦ بەنزینخانەی تر لە ھەولێر سزادران
کوردسات نیوز
١٦ بەنزینخانەی تر لەھەولێر و دەوروبەری بەھۆی فرۆشتنی بەنزینی خراپ و دەستکاریکردنی کوالێتییەکەی سزادران. لە ماوەی ٢ مانگیشدا ١٨٨ بەنزینخانە سزادراون.
راگەیاندنی پارێزگای ھەولێر بڵاویکردەوە، ١٦ بەنزینخانەی تر لەھەولێر و دەوروبەری لەلایەن لیژنەی پشکنین و چاودێریکردنی بەنزینخانەکانی سەر بە بەڕێوەبەرایەتی نەوت و کانزاکانی ھەولێر سزادراون، رێکاری یاساییش بەرامبەر خاوەنەکانیان گیراوەتەبەر.
تیمەکانی لیژنەی پشکنین و چاودێریکردنی بەنزینخانەکان راسپێردراون، جگە لەتوندکردنی رێکارەکان بەرامبەر سەرپێچیکاران، پشکنینی بەنزینخانەکان چڕتربکەنەوە.
لەسەرەتای مانگی ٦ەوە تا ئێستا، ١٨٨ بەنزینخانە لە ھەولێر سزادراون، هەشت بەنزینخانە بەھۆی دووبارەکردنەوەی سەرپێچی و دەستکاریکردنی کوالێتیی و فرۆشتنی بەنزینی خراپ بووە بە ھاووڵاتیان ناوەکانیان بڵاودەکاتەوە.
|