وەزارەتی نەوتی عێراق: لە ھەوڵداین بۆ دەستپێکردنەوەی ھەناردەی نەوتی ھەرێم

2023-12-02   |  
فۆتۆ: 
کوردسات نیوز
وەزارەتی نەوتی عێراق رایدەگەیەنێت، لە ھەوڵدان بۆ دەستپێکردنەوەی ھەناردەی نەوتی ھەرێمی کوردستان و تێپەڕاندنی کێشە یاسایی و تەکنیکی و داراییەکانی ئەو بابەتە.

عاسم جیھاد وتەبێژی وەزارەتی نەوتی عێراق، لەبارەی دەستپێکردنەوەی ھەناردەی نەوتی ھەرێمی کوردستان، رایگەیاند، حکومەتی عێراق سوورە لەسەر دەستپێکردنەوەی ھەناردەی نەوت لە رێگەی بەندەری جیھانی تورکیا و پەلەکردن لەو پڕۆسەیە.

وتیشی، لە ھەوڵی چڕدان بۆ چارەسەرکردنی کێشە یاسایی و تەکنیکی و داراییەکانی تایبەت بە گرێبەستە نەوتییەکانی کۆمپانیاکان لەگەڵ ھەرێمی کوردستان، چونکە ئەو گرێبەستانە جیاوازن لە گرێبەستەکانی وەزارەتی نەوتی عێراق و پێویستە فۆڕمی گرێبەستە نەوتییەکان بگونجێت لەگەڵ سیاسەتی وەزارەتی نەوت.

رۆژی ٢٥ی ئاداری ئەمساڵ، دوای بڕیارێکی دادگای ناوبژیوانیی نێودەوڵەتی لە پاریس، ھەناردەی نەوتی ھەرێمی کوردستان لە رێگەی تورکیاوە راگیرا و تائێستا دەستیپێنەکردووەتەوە، بەپێی وەزارەتی سامانە سروشتییەکانی ھەرێم، ئەو راگیرانە زیانی حەوت ملیار دۆلاری بە عێراق گەیاندووە.