وەزارەتی بازرگانی ھەرێم رایگەیاند، نزیکەی ٢٣٣ ملیاری دینار پارەی ئەمساڵی گەنمی جوتیارانی ھەرێم گەیشتووە و لە ئایندەیەکی نزیکیشدا بڕی ١٧٨ ملیاری دیکە دەگاتە ھەرێم.
وەزارەتی بازرگانی و پیشەسازی ھەرێم لە راگەیەندراوێکدا بڵاویکردەوە، لە کۆی ٤١١ ملیار و ٢٤ ملیۆن و ١٩٦ ھەزار دیناری پارەی گەنمی جوتیارانی ئەمساڵ، تاکو ئێستا حکومەتی عێراق نزیکەی ٢٣٣ ملیار دیناری ناردووە و بەپێی رۆژی وەرگرتنی گەنمەکانیان بەسەر جوتیاراندا دابەشدەکرێت.
ئەوەشی خستەڕوو، لە داھاتوودا ئەو بڕە پارەیەی لە پارەی گەنمی جوتیاران ماوەتەوە، کە ١٧٨ ملیار و ٢٤ ملیۆن و ١٩٦ ھەزار دینارە، لەلایەن حکومەتی فیدراڵەوە دەخرێتە سەر ھەژماری وەزارەتی بازرگانی و پیشەسازی ھەرێم و دواتر بەسەر جوتیاراندا دابەش دەکرێت.