لە ھەولێر ھۆشداری لە دروستبوونی لافاو دەدرێت

2022-11-24   |  
فۆتۆ: 
هادی
ئومێد خۆشناو پارێزگاری ھەولێر لە کۆنفڕانسێکی ڕۆژنامەوانیدا رایگەیاند، بەپێی پێشبینییەکانی کەشناسی لە بەرەبەیانی رۆژی ھەینی تا رۆژی شەممە بارانی بەلێزمە دەبارێت و ئەگەری دروستبونی لافاو ھەیە.

لەو پێناوەشدا ژورێکی ئۆپراسیۆن بە نوێنەرایەتی لایەنە پەیوەندارەکانی ھەولێر پێکھاتووە، داواشی لە ھاوڵاتیان کرد لەکاتی دروستبونی لافاو تیمەکانی بەھاناوەچونی پارێزگای ھەولێر ئاگادار بکەنەوە.

 

ئومێد خۆشناو راشیگەیاند، سەرباری کارکردنیان لە سەرەتای وەرزی ھاوین تا ئێستا و خەرجکردنی بودجەی تایبەت بۆ پێشگیری و رێگری لە لافاو، بەڵام ھێشتا مەترسی دروستبونی لافاو لەئارادایە.

لە مانگی ١٠ی ساڵی رابردوو لە هەولێر باران بارینی بەخوڕ لافاوی لە چەند گەڕەك و ناوچەیەك دروستكردوو زیانی بەچەندین ماڵ و ئۆتۆمبێل گەیاند.