وتار
وێنەکە لەبەغدا
یاسین تەها
لەئێستادا "حەیدەر عەبادی" سەرکردەی بکوژ و ببڕی ھەموو عێراقە و ھەموو پاڵپشتییەکی دەرەکی ھەیە لەوەی کردوویەتی و لەوەشی دەیکات، بەھیوای ئەوەی ببێتە باڵانس بۆی لەھەڵبژاردن. ھاوکات لەگەڵ ئەمەشدا دۆخێکی سیاسیی ئاڵۆز بەسەر بەغدادا زاڵە و دەکرێت لەم چەند سەرە قەڵەمەدا کورت بکرێتەوە:
ـ رۆژی ١٢ ئایاری ٢٠١٨ دیاریکراوە بۆ ھەڵبژاردنی ئەنجومەنی نوێنەران، کەچی پەیتا پەیتا و رۆژ نییە ھەموو سەرۆکایەتی و لایەنەکان ھوشیاری نەدەن لە ئەگەری دواخستنی پڕۆسەکە بە سەرۆک وەزیران و باڵیۆزخانەکانیشەوە، وەک ئەوەی تەدارەکی پڕۆسەکە فەراھەم نەبێت یان گرفتێکی گەورە ھەبێ بەتایبەت کێشەی نەگەڕانەوەی ئاوارەکانی سوننە بۆ جێگە و ڕیگەی خۆیان.
ـ بەفەرمی نزیکەی حەوت مانگی ماوە بۆ ھەڵبژاردن، کەچی یاسای ھەڵبژاردن تائیستا یەکلایی نەبووەتەوە لەپەرلەمان، ئەمەش شپرزەیی بۆ شێوازی پێکھێنانی لیست و ھاوپەیمانێتییەکان و چۆنییەتی بەشداریی کەرکوکییەکان لەو پڕۆسەیە دروست کردووە.
ـ حیزبی دەعوە بەفەرمی ساغ بوویەوە کە دوو لیستی جیاوازی ھەبێت بۆ ھەڵبژاردن (مالیکی و عەبادی)، ئەم ھەنگاوەش چاودێرانی دابەشکردووە لەمەڕ ئەوەی ئاخۆ حیزبی فەرمانڕەوا ئینشیقاق دەکات لەداھاتوو یان لەھەرکوێ بارانی دەنگ ببارێت باراناوەکەی دەڕژێتە کێڵگەی ئەمەوە.
ـ مالیکی فیتۆی زۆری لەسەرە و ناوی ھاوتایە لەگەڵ کارەساتەکانی کەوتنی موسڵ و سپایکەر و دەربەدەرکردنی سوننە و تاکڕەوی و کێشە زۆرەکانی لەگەڵ کورد، بەڵام ھێشتا لەگۆڕەپانی کێبەرکێدا بەھێز دەردەکەوێت و لیستە چاوەڕوانکراوەکەی عەبادیش نادیارە و بڕوا وایە لاواز بێت، بەپێچەوانەی ئەو پاڵپشتییە نێودەوڵەتییەی ھەیەتی.
ـ سەرکردەکانی حەشد چەندین دەرچەیان دۆزیوەتەوە بۆ خۆدزینەوە لەیاسای حیزبەکان و بەشداریی خۆیان بۆ ھەڵبژاردن مسۆگەر کردووە. بڕواش وایە حەشد لیستێکی ھاوبەشیان ھەبێت بەسەرۆکایەتی ھادی ئەلعامری کە بەپێی ئاماژەکان یەکێک دەبێت لە رکابەرەکانی پۆستی سەرۆک وەزیران.
ـ دەرکەوتنی پالێوراوێکی بەھێزی حەشد بۆ سەرۆکایەتی وەزیران ھەموو ڕیسەکەی ئەمەریکا و ئەوروپا و عەبادی دەکاتەوە بەخوری و لەبەر رۆشنایی ئەزمونی یەمەن و سوریا و لوبنان و بێسەروبەرەیی ھەنگاوەکانی ئیدارەی ترەمپ ئەم ئەگەرەش شتێکی مەحاڵ نییە.
ـ ھەر لەئێستاوە ھەڵمەتێکی راگەیاندنی ئێسک شکێن لەنێوان ڕکابەرە چاوەڕوانکراوەکانی عێراق لەفەیسبوک و لێدوانەکان و سوکایەتی و یەکتر شکاندن دەستیپێکردووە و چاوەڕوان دەکرێت ھەڵمەتی راستەقینە لەشێوەی قەسابخانەدا بێت بەتایبەت لەنێوان سەدرو مالیکی و عەبادی و مالیکی.
ـ بەشداریی کورد لەھەڵبژاردنی عێراق روون نییە کە بەیەک لیست دەبێت یان بایکۆت دەبێت یان ھەرکەس بۆ خۆی، ھاوکات لەگەڵ ئەمەش ئەگەر ھەیە نوێنەرایەتی کورد لە داھاتوو لەبەغدا ببێتە شتێکی ھاوشێوەی تەنسیقی ھەولێر و بەغدا و وەک ئێستا سەرۆکایەتیی کۆمار و وەزارەتی گرنگ بەدەست نەھێنێتەوە.
ـ رێککەوتنی بەغدا و ھەرێم چەندین بەربەستی لەپێشە لەوانەش بێ متمانەیی دوای ریفراندۆم، سووتانی کارتەکانی کورد، تەفسیری تاکلایەنەی دەقە دەستورییەکان، کێشەی قەرز و قۆڵە، تای ھەڵبژاردن و بەکارھێنانی وەک کارت، ھاوسەنگیی ئێرانی و ئەمەریکی، گرێی کەرکوک و ناوچە کێشە لەسەرەکان و دەروازە سنورییەکان.

ئەم وتارە دەربڕی ڕاوبۆچونی نوسەر خۆیەتی و کوردسات نیوز لێی بەرپرس نیە
12/15/2017 7:03:06 PM
‌‌ بابەتەکانی تری نوسەر ...