وتار
ئەو شەقامەی ڕووی لە خۆرھەڵاتە
ئازاد ئیبراھیم
تورکیا چەندێک لەھەوڵە دەرەکییەکانی بەردەوام بێت بۆ بوون بە ئەندام لەیەکێتیی ئەوروپا، ھێشتا زەمینە ناوخۆییەکەی تا ئەو ئەندازەیە خۆشنەکردووە لەگەڵ ژینگەی ئەوروپیدا خۆی بگونجێنێت. بەپێچەوانەوە ئاماژەگەلێکی ناوخۆیی ھەیە وادەکات بگوترێت ئەم وڵاتە ساڵانێکی زۆری ماوە، یان ھەر زۆر زەحمەتە ببێت بەئەندام لەیەکێتیی ئەوروپا. ئەگەر جارێک بەئاکسەرایی و تەقسیم و یوسف پاشاو سوڵتان ئەحمەدو کەناراوەکانی خۆرئاوای ئەستەنبوڵدا گوزەرێک بکەین، یان بۆ جارێک لەبەشی ئەوروپای ئەستەنبوڵەوە بچینە بەشی ئاسیای ئەستەنبوڵ و لەسیماو تایبەتمەندییەکانی شاری ئەستەنبوڵ وردبینەوە، تووشی پەستانێکی قورسی ھزری دەبینەوە تاکو بتوانین ئەم شارە بناسێنین و شوناسێکی خۆرھەڵاتی یان خۆرئاوایی بدەینێ. 
بەپێوەری ھەموو ئەو بەریەککەوتنانەی لە تورکیادا ڕوودەدات و ئاشنا دەبین پێی، تورکیا وڵاتێکی کراوەو دیموکرات و ئازادی وەک وڵاتانی ئەوروپا نییە، ئەوەندەی لەڕێگەی دیاردەکانی وەک زمان و شوێن "مزگەوت و باڵەخانەو میوانخانەکان" و پۆشاک و کارەوە لەوڵاتێکی تەواو خۆرھەڵاتی دەچێت و بەردەوام لەژێر چاودێرییەکی وردی ھێزە ئەمنییەکاندایە، ئەگەر دیاردەکانی سەر شەقامەکان و ھەموو ئەو وێنانە بخوێنینەوە کە شەقامی ئاکسەرای لەھەناوی خۆیدا ھەڵیگرتووە، ئەوا ھێندەی ئەم شەقامە ڕووی لەخۆرھەڵاتەو بەڕووی خۆرھەڵاتدا دەڕوانێت، ھێندە کراوەنییە بەڕووی خۆرئاواداو ئەستەنبوڵیش سیفاتەکانی شاری ئەوروپی ھەڵنەگرتووەو ئەستەمە بتوانێت ڕۆژانێک ھاوشان بە پایتەختەکانی تری یەکێتیی ئەوروپا ھەژماربکرێت. 
لەئەستەنبوڵدا ھیچ شتێک لەنێوان خۆرھەڵات و خۆرئاوادا خۆی یەکلایی نەکردۆتەوە لەبەرەیەکیاندا وەستابێت، زۆرترین مزگەوت ھێما بە وڵاتێک ناکات لەساڵانی ١٩٢٨ەوە دوای لابردنی مادەی "دووی دەستوور" خاوەن سیستمێکی عەلمانیی ئەتاتورکە، بەڵام ژمارەی مەیخانەو دیسکۆو باڕەکانیش ھاوسەنگە بەمزگەوتەکان، بۆیە دەکرێت بڵێین ئیسلامییەکەی تورکیا ئیسلامییەکی ئەوروپییە، بەڵام عەلمانییەت و دیموکراسییەکەیشی فۆڕمێکی خۆرھەڵاتی و ئاسیایی ھەیە، ئەگەرچی تورکیا ھێشتا لەپرسی تیرۆرو مافی کوردو شەڕی پەکەکەو ئازادییە گشتی و تایبەتییەکاندا ئامادەکاری تەواوی نەکردووە بۆ گەیشتن بەیەکێتیی ئەوروپا و ھەمیشە ڕەخنەی توندی لێدەگیرێت، بەھەمان شێوە لەناوخۆیشدا تورکیا ھێشتا بەشێکە لەو سیستمە خۆرھەڵاتییەی کە دیکتاتۆرییەتی نوێ و فاشیستی تورکی دەیئاژوون و زەمینەسازی ئەوتۆ نەکراوە، کە کەنگێ تورکیا بووە ئەندامی یەکێتیی ئەوروپا، نە کێشەیەک بۆ خۆی و نەبۆ یەکێتییەکەیش دروست بکات.

ئەم وتارە دەربڕی ڕاوبۆچونی نوسەر خۆیەتی و کوردسات نیوز لێی بەرپرس نیە
7/20/2017 10:48:05 PM
‌‌ بابەتەکانی تری نوسەر ...