وتار
ئایاری هەڵبژاردن و دۆخی هەرێم
به‌ختیار جەبار شاوه‌یس‌
سەرباری ھەوڵە بەردەوامەکانی سونەکان بۆ دواخستنی ھەڵبژاردنەکانی ئەنجومەنی نوێنەرانی عیراق، دواجار شیعەکان ھەژمونی سیاسی و ئیداری و پەرلەمانی و دیپلۆماسی خۆیان لەسەر کۆی پرۆسەی سیاسی پاراست و دوای ھێنان و بردەیەکی زۆر لەناو ھۆڵی ئەنجومەنی نوێنەران، بە نامەیەک بۆ دادگای باڵای فیدراڵی لەماوەی شەو و رۆژێکدا کۆتایی بەچەلەحانێکە ھێناو جگەلە دیاریکردنی دوانزەی ئایاری ئەمساڵ بۆ کاتی ئەنجامدانی ھەڵبژاردنەکە یاساکەیشی خستە دەنگدانەوە و ھەمان رۆژ سەرۆکایەتی کۆمارپەسەندی کرد.
لەکۆی گێرمەوکێشەکانی تایبەت بە ھەڵبژاردنەکانەوە دەکرێ ئاماژە بەوە بکەین کە بەپێی ژمارە بێت ئەوا ھەر زۆر پێشتر ھاوپەیمانی نیشتمانی دەیتوانی کێشەکە ساغ بکاتەوە و گوێ لە سونەکان نەگرێت بەوپێیەی کە خاوەنی ۱۸۱ ئەندامی پەرلەمانن و نیوەزیاتریان ھەیە ، بەڵام شیعەکان کە خاوەنی دەسەڵات و حوکمی عیراق دەکەن ، نەیانویست سیناریۆی بایکۆتی سونەکان لەساڵی ۲٠٠٥ دووبارە بکەنەوە و خوازیاربون کە بەبەشداری ھەموو پێکھاتەکان ھەڵبژاردن ئەنجامبدرێت و شەرعیەتی ئیقلیمی و نێودەوڵەتی لەدەست نەدات. ئەمە لەلایەک لەرەھەندێکی دیکەوە  دەرکەوتەوە ئەوەی شیعە بیەوێت لەعیراقدا ئەوە دەبێت ، ئیتر کێ عەقڵانی سیاسەت دەکات بالەمەتێبگات و نوقتە سەری دێڕ.
پێدەچێ ھەبێت پێیان وابێت کە دوانەخستنی ھەڵبژاردن ، پەیوەندی بەو زەمەنە دەستووریەوە ھەیە کە بۆی دیاریکراوە ، تارادەیەک ئەم تێڕوانینە واقیبوونی تیایە بەڵام پرسیارە جدیەکە ئەوەیە کەئایا ھەربەتەنھا لەم خاڵەدا دەستوور تێپەرێنراوە؟! ئەی رۆژانە ھەردوو حکومەتی بەغداد و ھەرێم لەسەرلادان وپێشێلکردنی دەستوور رۆشن دیارە کەچۆن یەکتر تۆمەتبار دەکەن ، ئیتر با مادە و خاڵەکانی تر بمێنێت کە لەبوارەکانی سەربازی، ئیداری، سیاسی ، ئابووری، وەبەرھێنان،خزمەتگوزاری بونیان ھەیەو ناکۆکن لەگەڵ رۆحی دەستوور.
لەپەیوەندیدا بەھەرێمی کوردستانەوە، لەقۆناغێکی دژواری ئابووری و سیاسی و بنبەستی پەیوەندیەکانیەوە پێدەنێتە ناو ھەڵبژاردنەکانی ئایارەوە، کەئەمەش ھەربەتەنھا لەناوخۆی ھەرێم و لەنێوان لایەنە سیاسیەکاندا قەتیس نەبوە، بەڵکو ئەم شلۆقیەی پەیوەندیەکانی ھەرێم بە بەغداوە درێژ بوەتەوە و ئاستی ھەرێمایەتی و دەولیشی گرتوەتەوە، کەسەرەتای ئەمەش بۆ دوای ئەنجامدانی ریفراندۆمەکەی مانگی ئەیلولی رابردوو دەگەرێتەوە و ھێدی ھێدی سەرۆکایەتی حکومەتی ھەرێم دەیەوێت جارێکی تر پەیوەندیەکانی لەگەڵ حکومەتی عیراق و تاران و دونیای دەرەوە لەرێگەی سەردان و کۆنگرەکانی لەبابەتی داڤۆس دروست و رێک بخاتەوە.
ئەوەی پەیوەندی بەپێگەی کوردەوە ھەیە چاوەرروان دەکرێت ژمارەی کورسیەکانی لەئەنجومەنی نوێنەران بدات لەکەمی بەتایبەت لەناوچە ناکۆکی لەسەرەکان کەفاکتەری ئەمەش جگەلەوەی کەلەرووی ئیداری و سەربازی و ئەمنی ودەسەڵاتەوە حکومەتی بەغداد بەرێوەی دەبات و ڕێژەیەکی زۆر لەھاوڵاتی کورد نەگەراونەتەوە ناوچەکانی خۆیان و رەوشەکە ئاسایی نەبوەتەوە، ھەروەھا ھۆکاری دووەم ئەوەیە کە بەداخەوە کورد نەیتوانی لانیکەم لەوناوچانە لیستێکی ھاوبەشی کوردستانی دروستبکرێت و دەنگەکانی کورد لەیەک سندوق کۆبکرێتەوە، خراپترلەمەش ھێزی سیاسی کوردی ھەیە لەکەرکوک وخانەقین بایکۆت دەکات و لەناوچەکانی تری ھاوشێوەی بەگەرم و گوریەوە بەشداری دەکات کە ئەم دوو فاقیە ھێندەی دیکە گورز لەسەنگی کورد و رێژەی دەنگەکان و ئاستی بەشداریکردن و حەماسیەتی ھاوڵاتیانی کورد دەدات
بۆئەوەی زەرەر لەنیوەی بگەرێتەوە، بەتایبەتی دوای ئەوەی کە بۆھەموو لایەک ساغبویەوە کەریفراندۆم کاتەکەی و ئامادەسازیەکانی نەلەجێی خۆی بوو نە بوونیان ھەبوو، ھەروەھا حاڵی حازر ئەوە روونبویەوە کەدەبێت لەگەڵ حکومەتی عیراق و لەچوارچێوەی دەستوور کێشەکانمان چارەسەر بکەین ومافەکانمان بەدیبھێنین و سیاسەتی گەرانەوە بۆ بەغداد پەیرەو دەکرێت. ھەرلەم دیدگایانەوە پێویستە لەزووترین دەرفەتدا ھەوڵی یەکخستنی تواناکان بدرێت و لەگەڵ چارەسەری رێژەیی کێشەوبژێوی ژیانی خەڵک ئامادەسازی بکەین بۆ بەشداریکردن لەھەڵبژاردنەکان ، بەوپێیەی کە سەنگی مەحەکی دەستخستنی مافەکانمان لەبەغداد زۆری رێژەی بەشداری لەپرۆسەی ھەڵبژاردن و بەرزی دەنگمانە  بەتایبەتی لەناوچە ناکۆکی لەسەرەکان ئەگەر نا تورکمان و عەرەب و ناحەزانی کورد سندوقەکانمان بۆ پڕدەکەنەوە

ئەم وتارە دەربڕی ڕاوبۆچونی نوسەر خۆیەتی و کوردسات نیوز لێی بەرپرس نیە
2/10/2018 2:40:16 PM
‌‌ بابەتەکانی تری نوسەر ...
به‌ختیار جەبار شاوه‌یس‌
به‌ختیار جەبار شاوه‌یس‌
به‌ختیار جەبار شاوه‌یس‌
به‌ختیار جەبار شاوه‌یس‌
به‌ختیار جەبار شاوه‌یس‌