وتار
عیراقی داھاتوو لەنێوان مالیکی و عەبادیدا
فه‌رید ئه‌سه‌سه‌رد‌
پاش بگرەو بەردەیەکی زۆر، جەمسەرەکانی حزبی دەعوە لەسەر ئەوە رێک کەوتن کە حزب لە ھەڵبژاردنی داھاتوی ئەنجومەنی نوێنەرانی عیراق بە دوو لیست دابەزێ، یەکێکیان بە سەرۆکایەتیی نوری مالیکی‌و ئەوی تر بە سەرۆکایەتیی حەیدەر عەبادی. ئەم رێککەوتنە چارەسەرێکی نمونەیی نییە، بەڵام لەناو بژاردە تاوتوێکراوەکاندا، بۆ حزبی دەعوە بژاردە باشەکەیەو دەرفەتێکیشە بۆ ھێشتنەوەی پۆستی سەرۆکی حکومەت بۆ ئەندامێکی حزبی دەعوە.
پێشتر بیر لەوە کرابۆوە کە ھەردوولا بەیەک لیست دابەزن، بەڵام رێک نەکەوتنی مالیکی‌و عەبادی لەسەر ئەوەی کە ناوی کامیان لە لیستەکەدا یەکەم ناو بێ، وای کرد بیر لە تاوتوێ کردنی بژاردەی تر بکەنەوە، لەوانە بژاردەی دابەزین بە دوو لیست.
بەدڵنیاییەوە ھیچ کام لە مالیکی‌و عەبادی بە بژاردەی دوو لیستی، ئاسودە نین. بەڵام ئەگەر ئەم بژاردەیە پەسند نەکرایە، ناکۆکییەکی سەخت دەکەوتە نێوانیانەوەو یەکپارچەیی حزبی دەعوە دەکەوتە ژێر ھەڕەشەوە. ھەرچەند ئێستاش ھەر بەدوو لیست دادەبەزن، بەڵام لانی کەم لە بانگەشەی ھەڵبژاردن یەکتر ناشکێنن‌و یەکتر تۆمەتبار ناکەن، ھەردووکیشیان بۆ سەروەریی حزبی دەعوە ھەوڵ دەدەن‌و ئامانجی ھەردووکیشیان ئەوەیە پۆستە سەرەکییەکە لە کۆتاییدا ھەر بۆ حزبی دەعوە بێت، چ پۆستەکە لە بەرەنجامی کۆتاییدا بۆ مالیکی بێ یان بۆ عەبادی یان بۆ ئەندامێکی دیکەی حزبی دەعوە.
ئەوەی کە تا ئەندازەیەکی زۆر یەکلا بۆتەوە، ئەوەیە کە دەنگەکانی بەغدا ھەر بۆ حزبی دەعوە دەچن. بەغداش لە نەخشەی ھەڵبژاردنی عیراقدا، وەک بازنەیەکی سەرەکی، بایەخی خۆی ھەیە. ئەمە لەلایەک. لەلایەکی ترەوە، ھەر یەک لە لیستەکەی مالیکی‌و لیستەکەی عەبادی، ھاوپەیمانی سوننە مەزھەبیان ھەیە. ئەمەش وا دەکا چانسی ھەردووکیان لە ناوچە سوننە نشینەکاندا چانسێکی بەھێز بێ. رەنگە گەورەترین دۆڕاو لەم ھەڵبژاردنە،سوننەکان بن کە زۆرینەی سەرکردە دیارەکانیان متمانەی شەقامی سوننەیان لەدەستداوەو ناوچەکانیان خاپور‌و وێرانن. کوردیش لە ناوچە جێناکۆکەکاندا ھێزی پێشووی نابێ‌و دەنگێکی زۆری شەبەک‌و مەسیحییەکان‌و ئێزدییەکان بۆ لیستەکانی تر دەچێ.
کەس بەقەد عەبادی بەپەرۆش نییە بۆ ئەنجامدانی ھەڵبژاردن لە وادەی خۆیدا. عەبادی لە بانگەشەی ھەڵبژاردندا زۆرتر پشت بە دوو دەستکەوتی گەورە دەبەستێ. یەکێکیان، بەدەست ھێنانی سەرکەوتنە بەسەر داعشدا کە ناوێکی درەوشاوەی بۆ دروست کردووەو ئەوی تر، ھەنگاوە گرنگەکانێتی بۆ ئەنجامدانی چاکسازی. چەند ھەڵبژاردن دوا بکەوێ، ئەوەندەش ئەگەری کزبوونی درەوشانەوەی سەرکەوتنەکەی بەسەر داعشدا زیاد دەبێ‌و ئەوەندەش کاریگەریی چاکسازییەکانی ھیۆرتر دەبێتەوە. ناوی لیستەکەی عەبادی کە بە لیستی «سەرکەوتن‌و چاکسازی» خۆی ناساندووە، گوزارشت لەو دەستکەوتە دەکات کە عەبادی بەدەستی ھێناون.
لەم نێوانەدا ھادی عامری، سەکردەی رێکخراوی بەدر و یەکێ لە دیارترین سەرکردەکانی حەشدی شەعبی، ھەوڵی رکابەری کردنی مالیکی‌و عەبادی دەدا‌و بە قۆستنەوەی سەرکەوتنەکانی حەشد لە شەڕی دژی داعشدا ئومێد لەسەر چنینەوەی زۆرترین دەنگ ھەڵدەچنێ. بەڵام عامری بە ئەستەم دەتوانێ دەنگێکی زۆرتر لە دەنگەکانی مالیکی‌و عەبادی بێنێ، بۆیە رۆڵی لە رۆڵی یەدەک بەولاوە زیاتر نابێ‌و لێی رادەبینرێ دەنگێکی باش بۆ قورسکردنی تای تەرازوی دەنگە بەدەستھێنراوەکانی حزبی دەعوە بەدەست بێنێ، ھەروەک دەشتوانێ، پاش راگەیاندنی ئەنجامەکانی ھەڵبژاردن، ھاوپەیمانی لەگەڵ مالیکی یان لەگەڵ عەبادی دروست بکا. پشتیوانیی عامری بۆ ھەر کام لە مالیکی‌و عەبادی، مایەی دەستەبەرکردنی پۆستی سەرەک وەزیرانە بۆ یەکێکیان.
لەبەرەنجامی کۆتاییدا مالیکی‌و عامری، بە بەراورد لەگەڵ عەبادی، لە سیاسەتەکانی ئێرانەوە نزیکترن‌و لەسەر زۆر مەسەلە ھاودید‌و ھاوڕان. رەنگە مەرجی عامری لەھەر ھاوپەیمانییەکیدا، بەدەست ھێنانی وەزارەتە ئەمنییەکان بێ. بەدی ھێنانی ئەم ئامانجەش پێناچێ کارێکی قورس بێ.
چاوەڕوان دەکرێ ھەڵبژاردنی ئەمجارە نەخشەیەکی سیاسیی تازە لە عیراق بێنێتەدی کە ئاسەوارێکی زۆری ھەم لەسەر ناوخۆی عیراق دەبێ ھەم لەسەر ناوچەکە بەگشتی.

ئەم وتارە دەربڕی ڕاوبۆچونی نوسەر خۆیەتی و کوردسات نیوز لێی بەرپرس نیە
1/15/2018 2:25:31 PM
‌‌ بابەتەکانی تری نوسەر ...
فه‌رید ئه‌سه‌سه‌رد‌
فه‌رید ئه‌سه‌سه‌رد‌
فه‌رید ئه‌سه‌سه‌رد‌
فه‌رید ئه‌سه‌سه‌رد‌
فه‌رید ئه‌سه‌سه‌رد‌