وتار
ھەڵەبجە تا عەفرین، دوای سی ساڵ بەم جۆرەی دەبینم
ستران عەبدووڵا

ھەڵەبجە رەمزە بۆ جینۆسایدی کورد، ئەوە تایتڵە سەرەکەییەکەی ناساندنی تراژیدیای ھەڵەبجەیە. بەڵام ئەم تایتڵە گەرەکە خورد بکرێتەوە بۆ چەندین ھەڵەبجۆکە. لەھەر کوێ نارێکی‌و چەوتیی‌و شێواوی ھەبێ‌و ناو لە شتانە وەکو خۆی نەنرێت، ناو لەگەڵ ناوەرۆک‌و ناوەرۆک لەگەڵ ژینگەی خۆی نامۆ‌و نارەوا بێت، ئەوە ھەڵەبجەیەکەو ئەوێ مینی جینۆسادیدە کە مەگەر بە میکرسکۆب بیبینین، دەنا لە فەوزای قەبەیی زوڵم‌و زۆر‌و میھرەجانی درۆ‌ودەلەسەدا غایب دەبێت. لە بنچینەشدا لە کارەساتی ھەڵەبجە ناخۆشتر ھەستی ھەڵەبجەییەکانە بەوەی ئەو کاتەی لێیان قەوما دونیا مژوڵی کێشە خاوەن قەبارەکان‌و کێشە خاوەن کێش‌و قورساییەکان بوون. ھەڵەبجەیی لەوەدا دوو جار زوڵمی لێ کرا کە لێی قەوماوەو کە لێقەومانەکەی بە بچووک لەئاستی قەومان‌و کێشەی گەورەتر دەبینرا. پشت بەو دوو ئازارەو پشت بەو شعورەی ھەڵەبجەیی لە دوو جار زوڵملێکردندا ھەیبوو، ھەر زوڵمێک کارەساتی ھەڵەبجەیەکەو ھەر بەکەم زانینێکی زوڵملێکراوەیی ھەڵەبجەیی زوڵمی دوو قاتە.
بەڵام ھەڵەبجە ھەر ناونیشانی ھەستکردن بە زوڵملێکراوی نییە، وەک لەدوا دێردا ڕەشمکردووە، بەڵکو ئاماژەشە بۆ نارێکی‌و شێواوی وەک لەسەرەتای سیپارەدا نووسیومە. نارێکی‌و شێواوییە باعیسی زوڵمی چەند پاتەی ھەڵەبجەو ھەستی زوڵملێکراوی لای ھەڵەبجەییەک.
ھەڵەبجە لەساتەوەختی خۆیدا کە قەوماوە دوا لوتکەی شێواوی پەیوەندییە لە نێوان دوواندا: زاڵم‌و زوڵملێکراو. دووان کە زوڵم‌و زوڵملێکراویان ناوەرۆکی پەیوەندییەکی خراپە لە لوتکەی تراژیدیادا تەقییەوەو بووە جینۆساید. پەیوەندی ھەڵەبجەی زوڵملێکراو‌و کیمیاوی زاڵم، ھەڵەبجەیی‌و کورد‌و کوردستانێتی وەک ئەوەی راستییەکی مێژوویین وەک ئەوەی سورشتێکی دەستکردی خودایین لەلایەک‌و عێراقێتی‌و دەوڵەتی مەرکەزی‌و عروبەو سوپا‌و جاش‌و کەموکوڕی کوردێتی لەلایەکی ترەوە. ئەگەر ئەم دوانە ئاماژە ئەبن بۆ کەموکوڕییەک لە پەیوەندییدا چۆن ھەڵەبجە دەقەوما؟ عیراقێتی‌و جوگرافیای رەسمی دانپیانراوی عیراق کە کوردستانیی پێوە لکاوەو ھەڵەبجەی بۆ کراوەتە قایمقامیەت‌و ھەڵەبجەیی بۆ کراوەتە خاوەن ناسنامەی عیراقی، تاوانباری سەرەکی ئەم شێواوەیەن. لە کرداردا نە بەو ناسنامە کار کراوەو نە بەو ناونیشانە پەیوەستگییە بوونێک ھەیەو ھەبووە..
ئەگەر عیراق وەکو کوردستانی باشوور لە سەرەتای سەدەی بیست کەوتە دەست‌و ھەڵەبجەی خستە ژێر رکێفی خۆیەوە بە ڕاستی دەوڵەتی عیراق بوایەو بەڕاستی نیشتمانیی کوردی کوردستان‌و ھەڵەبجەیی ھەڵەبجە بوایە چۆن کیمیابارانی دەکرد؟ ئەگەر نیشتمان لە جوگرافیا‌و مێژووش دابڕی‌و عیراقی رەسمی قەوارەیەکی رێککەوتیش بوایە دەیتوانی نیشتمانی ھەمووان بێت. ئەی بۆ ھەڵەبجە ماوەیەک لە سایەی ئینگلیزدا چانسی ئەوەی نەدایە عیراقی ئینگلیزی کە دەشێ وڵات بۆ ھەمووان بێت؟ بۆچی ھەڵەبجە ماوەیەک ناوەندی چەپی عیراقی‌و ماوەیەکیش ناوەندی ئیسلامیی شێوە ئیخوانی نەبوو کە دەکرا ببێتە پردی پەیوەندی لەگەڵ کۆی عیراقدا؟ ئەی بۆچی سلێمانی‌و ھەولێر‌و کەرکوکیش ئەو چانسەیان نەدایە عیراق کە بەڵێ با عیراقێک بێت بۆ ھەمووان، بە عیراقی قوڵایی مێژووی دەورانی ئاشووری‌و ھارون رەشیدی‌و عیراقی تازە دامەزراوی دوای لکاندنی کوردستانی جنوبی پێوەی؟
ئەگەر نیشتمانی عیراقی باوەڕی بەخۆی ھەبوایە ئەدی بەیت‌و بالۆرەی عروبەو بەعسێتی‌و عێراقێتی سەدامیەی ھەڵەبجەی بۆچی بوو؟
ئاخر عروبەو ھەڵەبجەی لەباوەش گرتووی دیوی ئەم دیوی ھەورامان کە یەکانگیرە لەگەڵ ھەورامانی ئەودیو کوجا مەرحەبا؟
ئەگەر ئەم پەیوەندییە لە بنچینەدا رێک بوایە بۆ دەگەیشتە لوتکەی ئیمپریالیزمی زوڵم‌و زۆری کیمیاوی؟
شێواوی‌و تاریکی لە نموونەی ھەڵەبجەدا بەڵگەیە لەسەر نارێکی ئەو کاتەی دەگاتە لوتکە..
بۆ لەناوبردنی ھەر ئەگەرێک کە لە پێشمانە گەرەکە لەسەرەتاوە نارێکی‌و چەوتی کەتبکرێت‌و لە ڕەگەوە چارەسەر بکرێت، لەبەرئەوەی چارە نەکرا لە شەنگال‌و لە عەفرینیش ھەڕەشەمان لێکراو ھەرەشەمان لەسەرە.
ئەم وتارە دەربڕی ڕاوبۆچونی نوسەر خۆیەتی و کوردسات نیوز لێی بەرپرس نیە
3/19/2018 11:53:16 AM
‌‌ بابەتەکانی تری نوسەر ...
ستران عەبدووڵا
ستران عەبدووڵا
ستران عەبدووڵا
ستران عەبدووڵا
ستران عەبدووڵا