نیوەڕۆی ئەمڕۆ، بەهۆی ناکۆکییەکی سادە لەسەر "سەگێک" لە گوندی دووسەرەی ناحیەی شەمامکی سەر بە هەولێر، هاووڵاتییەک کوژرا.

بەپێی زانیارییەکانی پەیامنێری کوردسات نیوز:، "ئیسماعیل قساب" دوای دەمەقاڵێیەک لەگەڵ دراوسێکەی کە پێشتر سەگی خێزانەکەیانی بردبوو، بە فیشەک کوژرا.

شایەتحاڵەکان دەگێڕنەوە کە شەوی پێشتر، بکوژەکە بەبێ ئاگاداری بنەماڵەی "ئیسماعیل" سەگەکەیانی بردووە. کاتێک "ئیسماعیل" بەیانی سەگەکەی خۆیانی هێناوەتەوە، ناکۆکی لەنێوانیان دروست بووە و  دواتر پەرەی سەندوە.

لە پاش تەقەکردن و بریندارکردنی رەوانەی نەخۆشخانەی رۆژئاوا کرا، بەڵام بەهۆی قورسی برینەکەیەوە گیانی لەدەستدا.

وێنەی ئیسماعیل قەساب کە لەلایەن دراوسێیەکیانەوە کوژرا

بافڵ تاڵەبانی بەشداری لە پرسەی بەڵێن ساڵحدا کرد و سەرەخۆشی لە خانەوادەکەی کرد.

ئەمڕۆ پێنجشەممە، بافڵ تاڵەبانی سەرۆکی یەکێتیی نیشتمانیی کوردستان لە سلێمانی بەشداری لە پرسەی بەڵێن ئەحمەد ساڵح رۆژمامەنووس و برای دکتۆر بەرهەم ساڵح سەرۆک کۆماری پێشووی عیراقدا کرد.

بافڵ تاڵەبانی لە نزیکەوە پرسە و سەرەخۆشی گەیاندە دکتۆر بەرهەم ئەحمەد ساڵح و کەسوکار و خانەوادەکەیان، هیواشی خواست، ئەم ماتەمە دواخەم و ناخۆشیان بێت.

نرخی ئەمپێری کارەبای موەلیدە بۆ مانگی سێ لە هەولێر دیاری کرا و بەپێی کارکردنی موەلیدە لە گەڕەکەکاندا نرخی یەک ئەمپێر لەنێوان سێ هەزار بۆ 12 هەزار و 500 دیناردایە.

خۆران خۆرانی سەرۆکی ئەنجومەنی موەلیدە ئەهلییەکانی سنوری پارێزگای هەولێر رایگەیاند، بۆ مانگی رابردوو نرخی موەلیدە بەپێی نرخی گازوایل لە بازاڕەکاندا بۆناو شاری هەولێر دیاری کراوە و بڕیارە رۆژی یەکشەممەی داهاتوو نرخەکەی لە دەرەویە شارەکانیدا دیاری بکرێت.

ئەوەش هاتووە، مانگی رابردوو موەلیدەکان رۆژانە بە تێکڕا نزیکەی حەوت سەعات و نیو کاریان کردووە و نرخی یەک لیتر گازوایل بە 530 دینار دیاری کراوە، بەوەش بۆ هەر کاتژمێرێک 43 دینار و نیو دەکەوێت.

نرخی موەلیدەکان بەم جۆرەیە:

-نرخی یەک ئەمپێر لەناو شاری هەولێر لەنێوان سێ هەزار بۆ 12 هەزار و 500 دیناردایە، ئەوەش بەپێی کاتژمێرەکانی کارکردنی موەلیدە لە گەڕەکەکاندا دەگۆڕێت.

- نرخی یەک ئەمپێر لە ناوبازاڕی شاری هەولێر لەنێوان سێ هەزار بۆ چوار هەزار و 500 دیناردایە.

حکومەتی بەریتانیا بڕیاری داوە یەک ملیۆن پاوەندی ستەرلینی وەک هاوکاری بداتە حکومەتی هەرێمی کوردستان بە مەبەستی بەرەنگاربونەوەی کۆچی نایاسایی و دەستگیرکردنی باندەکانی قاچاخچێتی.

بەپێی راگەیەندراوێک لە ماڵپەڕی فەرمی حکومەتی بەریتانیا، ئەم بڕە پارەیە بۆ هاوکاریکردنی هەرێمی کوردستانە لە هەوڵەکانی بۆ بەرەنگاربونەوەی باندەکانی قاچاخچێتی و کۆچی نایاسایی.

جگە لە پێشکەشکردنی هاوکاری دارایی، بەریتانیا راهێنان بە زیاتر لە 100کارمەندی سنوری و هێڵی ئاسمانی لە سلێمانی، هەولێر و دهۆک دەکات و ئامێری پسپۆڕی دیاریکردنی بەڵگەنامەی ساختەشیان بەسەردا دابەش کردووە بۆ سەرکوتکردنی باندەکانی قاچاخچێتی و بەرگرتن لە بەکارهێنانی بەڵگەی ساختە لە فڕۆکەخانەکان و سنورەکان.

بەریتانیا کە پێشەنگی جیهانییە لە دۆزینەوەی بەڵگەنامەی ساختە، شارەزایی و ئامێری پسپۆڕی و هەواڵگری هاوبەشی لەگەڵ حکومەتی هەرێمدا بەکارهێناوە بۆ دابەزاندنی ئەو رێگا سەرەکیانەی کە قاچاخچیەکان بەکاری دەهێنن.

حکومەتی بەریتانیا لە راگەیەندراوەکەیدا جەختی کردووەتەوە کە "هەموو دەسەڵاتێکمان لەبەر دەستدایە و بەکاری دەهێنین بۆ راوکردن و دادگاییکردن و هەڵوەشاندنەوەی باندەکانی قاچاخچیەتی". هەروەها ئاماژەی بەوەش کردووە کە بەریتانیا و عیراق هاوبەشی سەرەکی دەبن لەو هەڵمەتەدا.

ئەم هاوکارییە لە دوای بەشداری نوێنەری حکومەتی هەرێم دێت، لە لوتکەی بەرەنگاربونەوەی کۆچی نایاسایی کە لە چەند رۆژی رابردودا بە بەشداری نوێنەری چل وڵات لە لەندەن بەڕێوەچوو. دوای لوتکەکەش، وەزیری ناوخۆی هەرێم لەگەڵ هاوتا بەریتانییەکەی کۆبووەوە و لەو چوارچێوەیەدا ئەو بڕە پارەیە وەک هاوکاری درایە حکومەتی هەرێم.

وەزارەتی دادی عیراق ئازادكردنی نزیكەی 500 زیندایكراوی بە یاسایی لێبوردنی گشتی راگەیاند.

ئەحمەد لوعێبی وتەبێژی وەزراەتی دادی عیراق لە چاوپێكەوتنێكی تەلەفزیونیدا رایگەیاند، ئازادكردنی زیندانیەكان بە بڕیارێكی ئەنجومەنی وەزیرانی عیراقە و ئەوان تەنها لایەنی جێبەجێكارن.

وتیشی، وەزارەتەكەیان پلانی هەیە تا كۆتایی ئەمساڵ ئەو قورساییەی لەسەر زیندانییەكانی عیراق هەیە سوك بكەن، چونكە لە ئێستادا زیندانەكانی عیراق زۆر لە توانای خۆیان زیاتر زیندانییان تێدایە. 

وتەبێژی وەزارەتی دادی عیراق ئاشكراشیكرد، تا ئێستا نزیكەی 500 زیندانیكراو بە یاسای لێبوردنی گشتی ئازادكراون، بڕیاریشە رێكارەكانی ئازادكردنی ئەو زیندانییانەی كە یاساكە دەیانگرێتەوە خێراتر بكرێت بۆ ئەوەی زۆرترین زیندانی بە زووترین كات ئازاد بكرێن.

وەزیری گواستنەوەی توركیا رایگەیاند، لە چەند رۆژی داهاتوودا محەمەد شیاع سودانی سەردانی توركیا دەكات و ناوەڕاستی ئەمساڵیش ئەردۆغان دێتە بەغداد. 

عەبدولقادر ئورالئۆغلو، وەزیری گواستنەوەی توركیا رایگەیاند، پرۆژەی رێگەی گەشەپێدان قۆناغی باشی بڕیوە و توركیا بە بەندەری فاو و نیمچەدورگەی عەرەبی دەبەستێتەوە كە درێژیەكەی هەزار و 200 كیلۆمەتر دەبێت.

وتیشی، لەسەر بابەتی رێگەی گەشەپێدان محەمەد شیاع سودانی سەرۆك وەزیرانی عیراق لە چەند رۆژی داهاتوودا سەردانی توركیا دەكات.
وتیشی، دوای سەردانەكەی سودانی و لە ناوەڕاستی ئەمساڵیش رەجەب تەیب ئەردۆغان سەرۆكی توركیا سەردانی بەغداد دەكات و چاوەڕوان دەكرێت چەند بڕیارێك بدرێت كە پەیوەندی بە سەردانەكانی رابردووەوە هەبێت. 

ئەوەش لەكاتێكدایە، لە مانگی نیسانی ساڵی رابردوو ئەردۆغان سەردانی عیراقی كرد و 26 یاداشتی لێكتێگەیشتنیان ئیمزا كرد. 

هەسەدە و سوپای نیشتمانی سوریا رێككەوتن لەسەر ئاڵوگۆڕكردنی دیلەكان و تەرمەكانی یەكتری ئەمڕۆش چووە بواری جێبەجێكردنەوە.

روانگەی سوریا بۆ مافەكانی مرۆڤ بڵاویكردەوە، هەسەدە 40 تەرمی شەڕڤانانی خۆی لە سوپای نیشتمانی وەرگرتووەتەوە و 25 تەرمی چەكدارەكانی ئەوانیشی ڕادەستكردووەتەوە كە چواریان تورك بوون و لە چەند هەفتەی رابردوودا لە بەنداوی تشرین و پردی قەرەقۆزاق كوژراون.

هەروەها ئاماژەی بەوەش كردووە، نزیكەی 250 زیندانی كە لەلایەن ئیدارەی نوێی سوریا و ئەنجوومەنی گەڕەكی شێخ مەقسوود و ئەشرەفیەوە ڕاگیرابون، ئاڵوگۆڕ كران، ئەمەش وەك جێبەجێكردنی ڕێككەوتنی سەرەتایی لەنێوان هەردوولا.

رێكخراوێك ئاشكرای دەكات توركیا لە دوای پەیامەكەی ئۆجەلان, هێرشەكانی لە هەرێمی كوردستان بەشێوەیەكی بەرچاو زیادی كردوە.

بە پێی راپۆتی رێکخراوی سی پی تی CPTـی ئەمریکی لە هەرێمی كوردستان، سوپای توركیا تەنها لە مانگی رابردودا 118 هێرشی لە هەرێمی كوردستان ئەنجام داوە.

رێکخراوی سی پی تی رونی كردوەتەوە كە دو هەفتە پێش پەیاماكەی عەبدوڵا ئۆجەلان، رێبەری بەندكراوی پارتی كرێكارانی كوردستان پەكەكە، هێرشەكانی سوپای توركیا 145٪ بەراورد بە رابردو زیادی كردوە بەڵام لە دوای پەیامەكە هێرشەكانی ئەو سوپایەی بەراورد بە مانگی شوبات تەنها 12 بۆ 21٪ كەمی كردوە.

هێزەكانی پاراستنی هەپەگە رایگەیاندوە لە دوای ئاگربەستی پەكەكە زیاتر لە 11 هێرش كراوەتە سەر ناوچەكانی گەریلا.

هێزە ئەمنییەکانی ئیستانبوڵ 16 کەسیان بەتۆمەتی بانگەشەکردن لە تۆڕە کۆمەڵایەتییەکان بۆ بایکۆتکردنی کاڵا و براندەکان دەستبەسەر کرد.

بەپێی ئەو زانیارییانەی میدیاکانی تورکیا بڵاویانکردووەتەوە، درەنگانی شەوی چوارشەممە، هێزە ئەمنییەکانی ئیستانبوڵ 16 کەسیان دەستبەسەر کرد کە بە ئامانجی پشتیوانیکردن لە ئەکرەم ئیمامئۆغڵو سەرۆکی دەستگیرکراوی گەورە شارەوانیی ئیستانبوڵ، بانگەشەی بایکۆتکردنی کاڵا و براندەکانیان کردبوو.

لەو بارەیەشەوە دەستپێشخەری دەنگی پارێزەران کە پێکهاتووە لە کۆمەڵێک پارێزەر، رایگەیاندووە، هێزە ئەمنییەکان لیستێکی دیکەی 16 کەسیان ئامادە کردووە بۆ دەستبەسەرکردن، و پێشبینی دەکرێت ژمارەی دەستگیرکراوان زیاتر بێت.

هەروەها ئاشکرایان کرد، ئەو کەسانەی دەستبەسەر کراون بە تۆمەتی "تێکدانی ئابووری تورکیا" دادگایی دەکرێن.

هەڵمەتی دەستگیرکردنەکان کاردانەوەی جیاوازی بەدوای خۆیدا هێنا و لەهەمان کاتدا ئۆزگور ئۆزەل سەرۆکی پارتی جەهەپە پشتگیری خۆی بۆ بایکۆتەکە دووپات کردووەتەوە و وەک "مافێکی دیموکراسی" ناوی هێناوە.

بەڵام عەلی یەریلکەیا وەزیری ناوخۆی تورکیا، رایگەیاند: "بانگەوازی بایکۆت، تێکدانی سەربەخۆیی ئابووریمانە و هەوڵی کودەتایە لە دژی ئابووریی تورکیا."

دوای دوو هەفتە لە دەستگیركردنی ئەكرەم ئیمامئۆغڵو سەرۆكی گەورە شارەوانی ئیستەنبوڵ، جەهەپە بەردەوامە لە نیشاندانی ناڕەزایی و رێكخستنی گردبوونەوە جەماوەرییەكان لە ئەنكەرە و شارەكانی تری توركیا، جەهەپە لە نوێترین هەڵوێستیدا داوای بایكۆتی ئەو كاڵا و خزمەتگوزارییانە دەكات كە پێدەچێت پەیوەندییان بە حكومەتی رەجەب تەیب ئەردۆغان سەرۆك كۆماری توركیاوە هەبێت.

ئەمەش دەسەڵاتدارانی تورکیای توڕە کردووە و دژ بە بکەرانی ئەو بایکۆتە کەوتوونەتە هەڵوێست وەرگرتن.