یەکێتی: حکومەتی عێراق ئەرکە یاساییەکانی بەرامبەر ھەڵەبجە بەجێنەھێناوە

یەکێتی: حکومەتی عێراق ئەرکە یاساییەکانی بەرامبەر ھەڵەبجە بەجێنەھێناوە

مەکتەبی سیاسیی یەکێتی لەیادی ٣١ ساڵەی تاوانی کیمیابارانکردنی ھەڵەبجە راگەیەنراوێکی بڵاوکردەوە و رایگەیاند: ٣١ ساڵ بەر لەئێستا تاوانی کیمیابارانکردنی ھەڵەجە، لەناو گازی خەردەل ‌و بێدەنگیی دنیا، خنکێنرا و  کۆمەڵی نێودەوڵەتیش لە ئاست ئەو  تاوانە گەورەیەدا بەدەنگ نەھاتن.

لەراگەیەنراوەکەدا ھاتووە، تاوانی کیمابارانکردنی ھەڵەبجە، بەپێی یاسا و پەیماننامەنێودەوڵەتییەکان بە تاوانی دژە مرۆڤایەتی ‌و جینۆساید ئەژمار دەکرێت، لەگەڵ زنجیرەیەک تاوانی تری وەک ئەنفال‌و تەعریب‌و تەرحیل‌و تەبعیس و تەسفیر، لەچوارچێوەی ستراتیژی پاکتاوی نەژادی کە بەرامبەر بە گەلی کوردستان ئەنجامی دەدا. 

ھاوکات ئاماژەی بۆ ئەوەشکردوە، ئەمساڵ لەکاتێکدا یادی کیمیابارانکردنی ھەڵەبجە دەکرێتەوە، ئێستا ھەڵەبجە پارێزگایە و قۆناغ بە قۆناغ، رێوشوێن‌و ھەنگاوەکانی بوون بە پارێزگایەکی گەشەکردوو جێبەجێ دەکرێت، ھەروەھا دەستنیشانکردنی وەک پایتەختی ئاشتی، دەستکەوتێکی گرنگی نیشتمانی و نەتەوەییە بۆ ھەڵەبجەییەکان و تەواوی گەلی کوردستان،  مەکتەبی سیاسی راشیگەیاندووە، ھێشتا حکومەتی عێراق ئەرک‌و ئیلتزامەکانی بەرامبەر بە ھەڵەبجە بەجێنەھێناوە، لەوانەیش جێبەجێکردنی بڕیارەکانی دادگای باڵای تاوانەکانی عێراق، کە پێویستە حکومەتی عێراقی بەڕەسمی داوای لێبوردن لە گەلی کورد بەگشتی و دانیشتووانی ھەڵەبجە بەتایبەت بکات و قەرەبووی زیانلێکەوتووان بکاتەوە.

راگەیەندراوی مەکتەبی سیاسی یەکێتیی نیشتمانیی کوردستان لەیادی (٣١) ساڵەی کیمیابارانکردنی شاری ھەڵەبجەدا 

-  کەسوکاری سەربەرزی شەھیدانی کیمیابارانی ھەڵەبجە!
- بەرکەوتووان‌و بریندارانی چەکی کیمیایی و قوربانیانی زیندووی تاوانی سەردەم لە ھەڵەبجەی شەھیدان!
- کۆمەڵانی خەڵکی کوردستان!

(٣١) ساڵ بەر لە ئێستا، ڕژێمی بەعس، لە ڕۆژی (١٦/٣/١٩٨٨) بەچەکی کیمیایی قەدەغەکراوی نێودەوڵەتی، شاری ھەڵەبجەی بوردومانکردو لەماوەیەکی کەمدا زیاتر لە (٥٠٠٠) مرۆڤی بێتاوانی  کورد، لە ژن و منداڵ و پیرو لاو، شەھیدبوون و ھەزاران مرۆڤی تریش برینداربوون، کە بەشێکیان دواتر بەھۆی برینەکەیانەوە شەھیدبوون‌و بەشێکیانیش تائێستا لەدۆخێکی تەندروستی خراپدان. 
جگە لە زیانە مرۆییەکان، شارەکەش وێران و خاپوورکراو،  ئەم تاوانە گەورەیە لەناو گازی خەردەل‌و بێدەنگیی دنیای بێویژدانی کۆتایی سەدەی بیستەمدا، خنکێنراو کۆمەڵی نێودەوڵەتی ئەو کاتە لە ئاست تاوانێکی گەورەی دژە مرۆڤایەتی وەک کیمیابارانکردنی ھەڵەبجە بەدەنگ نەھاتن. 
لەم یادە خەمناکەدا، جارێکی تر سەری رێزو وەفاداری لە ئاست شەھیدانی ھەڵەبجە دادەنەوێنین‌و سڵاوی خۆراگریی بۆ برینداران‌و بەرکەوتوانی کیمیایی دەنێرین، کە سێ دەیەیە بە ئازارەوە ژیان دەگوزەرێنین. سڵاوی ئەمەکداریی بۆ خەڵکی ھەڵەبجە، پارێزگای شەھیدان‌و مەڵبەندی ھەمیشە زیندووی کوردایەتی‌و کولتورو ئەدەب‌و زانست دەنێرین، کە ھەمیشە سەرمەشقی خەبات‌و قوربانیدان بوونە بۆ ڕزگاری‌و سەرفرازی کوردستان. 
تاوانی کیمابارانکردنی ھەڵەبجە، کە بەپێی یاسا‌و پەیماننامە نێودەوڵەتیەکان بە تاوانی دژە مرۆڤایەتی‌و جینۆساید ئەژمار دەکرێت، وەک ھیرۆشیماو ناکازاکی و چەندین تاوانی تر. ترۆپکی سیاسەتی شۆڤێنیانەی ڕژێمی بەعس بوو، کە لەگەڵ زنجیرەیەک تاوانی تری وەک ئەنفال‌و تەعریب‌و تەرحیل‌و تەبعیس‌و تەسفیر،  لەچوارچێوەی ستراتیژی پاکتاوی نەژادی بەرامبەر بە گەلی کوردستان ئەنجامی دەدا. 
سەرباری زیانە زۆرەکانی مرۆیی‌و ماڵی بەڵام، خۆراگری خەڵکی کوردستان‌و بەردەوامیی خەباتی ھێزی پێشمەرگەو تێکۆشەرانی کوردستان،  نەیانھێشت خەونی شۆڤێنیانەی بەعس بۆ لەناوبردنی شۆڕش‌و ئیرادەی گەلی کوردستان بێتەدی. بەڵکو بەھۆی ڕاپەرینی ئازاری ١٩٩١‌و پرۆسەی ئازادی عێراق‌و خەبات‌و قوربانیدانی چەندین ساڵەی گەلەکەمان، رژێمی بەعس ڕۆخێنراو بەشێکی زۆری تاوانبارانی پاکتاوی نەژادی بەرامبەر بە گەلی کوردستان بەسزای یاسایی خۆیان گەیشتن. 


گەلی خۆراگری کوردستان! 

 ئەمساڵ لەکاتێکدا یادی (٣١) ساڵەی کیمیابارانکردن و جینۆسایدکردنی ھەڵەبجە دەکەینەوە،  ئێستا ھەڵەبجە ناوەندی پارێزگایەو قۆناغ بە قۆناغ، رێوشوێن‌و ھەنگاوەکانی بوون بە پارێزگایەکی گەشەکردوو جێبەجێ دەکرێ، سەرباری ئەوەی بەپارێزگاکردنی ھەڵەبجەو دەستنیشانکردنی وەک پایتەختی ئاشتی، دەستکەوتێکی گرنگی نیشتمانی و نەتەوەییە بۆ ھەڵەبجەییەکان‌و تەواوی گەلی کوردستان، پێویستە ئەوەش بزانرێ کە تائێستا کاریگەرییەکانی ئەم تاوانە گەورەیە بەسەر شارەکەو دانیشتووانەکەی، ماوەتەوە.
بۆیە لە ئێستادا کارکردن‌و ھەوڵدان لەدوو ئاستدا بۆ ھەڵەبجە وەک پارێزگا، بۆ ھەڵەبجە وەک کەیسی جینۆساید‌و تاوانی دژەمرۆڤایەتی،  بەئەرکی ھەموولایەکی دەزانین، یەکێتیی نیشتمانیی کوردستانیش وەک ھەمیشە لەم پێناوەدا درێغی ناکات‌و خزمەتکردنی ھەڵەبجە وەک ئەرکێکی نیشتمانیی‌و نەتەوەیی‌و شانازییەکی گەورە تەماشا دەکات. 
لە ئاستی کەیسی تاوانی ھەڵەبجەدا، ھێشتا حکومەتی عێراق ئەرک‌و ئیلتزامە یاساییەکانی بەرامبەر بە ھەڵەبجە بەتەواوەتی بەجێنەھێناوە، لەوانەیش جێبەجێکردنی ناوەرۆکی بڕیارەکانی دادگای باڵای تاوانەکانی عێراق، کە گرنگترینیان بریتییە لەوەی حکومەتی عیراقی فیدراڵ، وەک میراتگرەوەی حکومەتە یەک لەدوای یەکەکانی عیراق، بەڕەسمی داوای لێبوردن لە گەلی کوردستان بەگشتی‌و دانیشتووانی ھەڵەبجە بەتایبەت بکات و قەرەبووی زیانلێکەوتووانی تاوانەکەو کەسوکاری قوربانییەکان بکاتەوە، لە ئاوەدانکردنەوەو گەشەپێدانی پارێزگاکەدا رۆڵی ھەبێت. 
لە ئاستی پارێزگای ھەڵەبجەو خزمەتکردنی سنورەکەدا، پێویستە، کە حکومەتی ھەرێمی کوردستان، بەرنامەیەکی ھەمەلایەنە گەڵاڵە بکات بۆ پارێزگای ھەڵەبجەو تەواوی شارو شارۆچکەو گوندەکانی سنوری پارێزگاکە، بۆ بوژانەوەو خزمەتکردنی زیاترو زیاتری شارەکە، چارەسەری بریندارو بەرکەوتووەکانی چەکی کیمیایی، ھەروەھا بایەخدان بەبواری کلتوریی پایتەختی شارەزوور، کە خۆی مەڵبەندێکی دێرینی زانست‌و عیرفانە.
دوای (٣١) ساڵ ھێشتا ئەرکی زۆر ماون ڕابپەرێنرێن بۆ بە جنیۆساید ناساندنی کەیسی ھەڵەبجە لەئاستی نێودەوڵەتیدا، ھەر بۆیە ھەڵمەتێکی چڕی پێویستە، کە ھەموو لایەک وەک پرسێکی نیشتمانیی‌و نەتەوەیی گرنگ تێدا بەشداربن. 


یادی ھەڵەبجەو بیروەرییەکانی تری گەلەکەمان، پێویستە ببنە ھەوێنی یەکێتی ریزەکانی گەلەکەمان‌و تەبایی نێوان سەرجەم لایەنە سیاسیەکانی کوردستان‌و چارەسەرکردنی کێشەکان‌و چاکسازیی ڕاستەقینە بن، ھێشتا تەواوی ئاوات‌و ئامانجی شەھیدانی ھەڵەبجەو تێکرای شەھیدانی کوردستان‌و ئەنفالکراوەکان بەدینەھاتووە، چەسپاندنی مافە نیشتمانیی‌و دەستوری‌و دیموکراسیەکانی گەلی کوردستان، ھەماھەنگی‌و یەکھەڵوێستی ھەموولایەکی پێویستە. 

- نەمریی بۆ شەھیدانی ھەڵەبجە و ھەموو شەھیدان‌و ئەنفالکراوانی کوردستان
- نەفرەت لە ئەنجامدەرانی جینۆ