مووشەکی کاتیۆشا ئاڕاستەی باڵیۆزخانەی ئەمریکا کرا لە بەغداد

مووشەکی کاتیۆشا ئاڕاستەی باڵیۆزخانەی ئەمریکا کرا لە بەغداد

شەوی یەکشەممە، مووشەکی کاتیۆشا ئاڕاستەی باڵیۆزخانەی ئەمریکا لە ناوچەی سەوزی بەغداد کرا و باڵیۆزخانەکەش زەنگی هۆشداری لێدا.

شانەی راگەیاندنی ئەمنیی عێراق رایگەیاندووە: مووشەکی کاتیۆشا لە ناوەڕاستی ناوچەی سەوز کەوتووەتە خوارەوە بێ ئەوەی هیچ زیانێکی لێبکەوێتەوە.

سەرچاوەیەکی ئەمنیی عێراقیش رایگەیاندووە: بە مووشەکی کاتیۆشا ناوچەی سەوزی بەغداد کراوەتە ئامانج کە باڵیۆزخانەی ئەمریکای تێدایە.

پەیامنێری کوردسات نیوز رایگەیاند: هێزێکی زۆری ئەمنیی عێراق لە ناوچەکەدا بڵاوەیانپێکراوە و لێکۆڵینەوەکانیش دەستیپێکردووە بۆ ئەوەی سەرچاوەی مووشەکەکان بدۆزنەوە.

ئەمەش لەکاتێکدایە، هەفتەی رابردوو، وەزارەتی دەرەوەی ئەمریکا داوای لە کارمەندە ناپێویستەکانی لە باڵیۆزخانەی ئەمریکا لە بەغداد و کونسوڵگەری لە هەولێر کرد ئەو وڵاتە جێبهێڵن، ئەمەش دوای ئەوەی بەهۆی ململانێکانی ئێران و ئەمریکاوە، ئاڵۆزییەکانی عێراق رووی لە هەڵکشان کرد.